Ade-ade aje tingkahnye orang Betawi zaman dulu. Nih kisah keluarge aye, nyak, babe, engkong ame nenek aye asli orang Betawi nyang lugu, maklum aje dah namenye juga orang dulu.Kejadiannye dulu waktu lift atawe elevator masih merupakan benda nyang langkah dan jarang kite temuin. Pengalaman ni saat nyak aye masih kecil, waktu ntu gedung Sarinah Thamrin baru berdiri dengan megahnye sebagai salah satu bangunan modern di Taneh Jakarte. Sebagai orang biase nyang penasaran banget pengen tau pegimane rasanye masuk gedong betingkat nyang megah, ngkong aye punye inisiatif ngajak semue anggote keluarge buat jalan-jalan refreshing gitu dah, masuk ke gedong Sarinah. Bareng ame nenek, nyak aye juga ane 'mponye, mereka berempat jalan kaki nelusurin jalanan menuju Thamrin liwat Kebon Kacang.
Sampainye di sane, pade takjub semue ngeliat megahnye gedong sarinah. Banyak hal-hal baru nyang ditemuin di sane bikin kagum pade saat ntu. Dan nyang paling dikagumin adalah lift atau elevator, dan semue pade berniat untuk mencobanye…..
Sampai ditempat nyang dimaksud, ngkong aye segra ngajak smue keluarganye pade masuk lift, nyobain pegimane rasanye naik lift. Lift bergerak naik. Satu-satu orang pade keluar, pas tiba di lantai nyang mereka tujuin. Nah ahirnye tinggal nyak aye sekeluarge ni nyang menuju lantai paling atas. Pas pintu lift kebuke ngkong aye ngajak semuanye pade keluar. Begitu keluar, ade perasaan bingung dialamin nenek aye nyang celingak-celinguk nyari sesuatu ke arah lantai atawe ubin. Nyak aye tanye,"Nyari apaan, ma?". Nenek aye dalam keadaan masih bingung menjawab, "Sendal emak! Siape nyang ngambil, ye!?". "Lha emangnye sendalnye emak kemanain?" Nyak aye dan Mponye ikut bingung. Nenek aye dengan lugunye menjawab, "Tadi sendalnye emak lepas pas depan pintu lift, soalnye karpet di dalem lift bersih banget, sendal emak kan kotor". Mendengar itu nyak aye dan mponye pade ketawe terpingkal-pingkal kaga berenti-berenti. Ngkong aye ga ketinggalan ikutan ngakak…. Dikiranye masuk ke Musholeh, kali, ye… Nyang jelas tuh sendal ketinggalan di lantai paling bawah, lah..
Dasar-dasar, aye nyang ngedengar cerite ni dari nyak aye lantas aje lkutan ketawe ga abis-abis ampe akhirnye aye abadi'in nih cerite buat bagi-bagi ketawe..
Ditulis pada hari Rabu yang lalu · Komentari · Suka
Tidak ada komentar:
Posting Komentar